ربيع عمرى راح واقابل خريفة

--(( ربيـع عمـري راح واقبـا ل خـريفه ))--

نواااااف واللا نووووف واللا منيفه
................ مافيه فرق في الاسامي والاشـكال

مادام كل ماشــي طــوع كيفه
................ وكل يســمي نفسه وقال رجـال

اليوم كل شـــال رمحه وسيفه
................ وكل حمل في الجيب سبحه وجوال

مادام ماعـندك ســجل تضيفه
................ لاخير في دنيـاك في كل الاحوال

ابحث عن الطاعات لو هي كليفه
................ ولاتنخدع في الشكل لو مرك ازوال

الصقر في عالي الطـوال المنيفه
................ وكر الصقر في عالي الرجم مازال

الاش نقص في مقــامه لضيفه
................ اللاش قاصــر دايم الدوم محتال

ياناس حنا في حيــــاة مخيفه
................ كل ترك دينه ويلهـث وراء المال

والله شــفنا مجتمعــنا بشيفه
................ تغيرت الاحــوال حال بعد حال

وين الشرف وين النفوس الشريفه
................ كثر الكلام وموضة القـيل والقال

العمر ماباقــي يكـون النصيفه
................ والفعل مع الاجواد يضربه امثال

ربيـع عمري راح واقبـل خريفه
................ يالله تزين لــي خواتيم الاعمال

نواااااف واللا نوووف واللا منيفه
................ بعض الرجال يزين لويلبس الشال